Në fokus të punës sonë në Qendrën Spitalore Universitare “Nënë Tereza” është pacienti dhe shërbimi që i ofrohet nga ekipi mjekësor dhe ai mbështetës. Një ndër shërbimet më delikatë është Shërbimi i Urgjencës, i cili pret rreth 200 pacientë në ditë dhe kërkon shpejtësi dhe profesionalizëm në dhënien e ndihmës së parë.
Shërbimi i Urgjencës së Sëmundjeve të Brendshme u përfshi në një projekt të organizimit funksional të saj, për të transmetuar tek pacientët më shumë siguri, orientim, informacion dhe cilësi shërbimi.
Sa më sipër u realizua në sajë të përmirësimit të elementëve të sistemit të komunikimit me pacientin, kodifikimit, recepsionit, përmirësimit të infrastrukturës ndihmëse si barrelat profesionale dhe aksesorë ndihmës në zonën e triazhit si dhe vendosjes së një sistemi elektronik në hyrjen e Zonës së Observimit dhe Zonës së Kuqe të Emergjencës.
Stafi infermieror po i nënshtrohet një cikli trajnimesh profesionale për punën në shërbimin e urgjencës. Në organizimin e ri të urgjencës është përfshirë edhe ekipi i punonjësve socialë, të cilët ndjekin ecurinë e punës në shërbim, informojnë rastet si dhe lehtësojnë komunikimin me familjarët dhe të afërmit e pacientëve.