Pacientët e vegjël që trajtohen në shërbimin e Pediatrisë së Përgjithshme në QSUT do të kenë së shpejti dy dhoma të rinkonstruktuara për të qëndruar në kushte sterile.
Rikonstruktimi i këtyre ambienteve do të mundësohet nga një projekt i Albcontrol në bashkëpunim me Drejtorinë e Qendrës Spitalore Universitare “Nënë Tereza”, në mbështetje të nismës së Qeverisë “Shqipëria dhuron”.
“Iniciativa e parë do të jetë krijimi i dy bokseve të sterilitetit për fëmijët me sëmundje imunitare duke përmirësuar kushtet e hospitalizimit dhe për të ofruar pajisjet dhe aparaturat biomjekësore që do të nevojiten për to. Ne falenderojmë përzemërsisht, jo vetëm AlbControl që në këtë rast na u gjend i pari në këto ditë të vështira të spitalit për mungesa të fondeve, që tashmë ne i dimë, por edhe në vijim për mbështetjen që na kanë siguruar për të zhvilluar edhe më tej përmirësimin e ofrimit të shërbimit ndaj fëmijëve”, u shpreh drejtoresha e QSUT-së, Ogerta Manastirliu.
Në ditët në vijim ky projekt do të marrë formë zyrtare, për të vendosur afatet e realizimit dhe dorëzimin sa më shpejt në ndihmë të pacientëve të vegjël.
Pacientëve të vegjël që trajtohen në Shërbimin e Kirurgjisë së Përgjithshme iu shpërndanë dhurata.