Shoqata e mjekëve kardiologë të Shqipërisë zhvilloi konferencën e 17-të kombëtare të këtij shërbimi me temë “Sëmundjet kardiovaskulare dhe shtatzania”.
Në konferencë merrnin pjesë mjekë kardiologë nga i gjithë vendi, për të referuar, diskutuar dhe shkëmbyer eksperiencat profesionale. Disa nga temat e disktuara në këtë konferencë ishin “Epidemiologjia dhe ndryshimet hemodinamike, hemostatike dhe metabolike gjatë shtatzënisë”, “Diagnoza dhe kujdesi kardiovaskular gjatë shtatzanisë dhe lindjes”, “Vlerësimi fetal dhe testet gjenetike. Metodat e kontracepsionit dhe ndërprerjes së shtatzanisë, fertilizimi in vitro”, “Sëmundjet e lindura të zemrës dhe hipertensioni pulmonar”, etj.
Nga statistikat vjetore të Qendrës Spitalore Universitare “Nënë Tereza”, shërbimi i Kardiologjisë është ndër shërbimet me fluksin më të madh të shtrimeve, me rreth 4.500 pacientë në vit, me 10.5 ditë qëndrimi mesatar për pacient. Çdo vit në shërbimin e Hemodinamikës, kryhen rreth 2 mijë koronarografi dhe duke parë fluksin në rritje të sëmundjeve kardio-vaskulare, këto shifra pritet të rriten.