Komiteti i Kontrollit të Infeksioneve Spitalore të QSUT “Nënë Tereza” është një strukturë e rëndësishme teknike përgjegjëse për parandalimin dhe uljen e infeksioneve spitalore, e cila pas disa vitesh mungesë rifilloi funksionimin e saj në 28.02.2014.

Në mbledhjen e parë të këtij komiteti ishin të pranishëm mjekë të specialiteteve të ndryshme dhe drejtuesit më të lartë të QSUT në cilësinë edhe të anëtarëve të komitetit.

Infeksionet nozokomiale konsiderohen sot tregues të cilësisë së shërbimeve të ofruara në një spital apo çdo institucion tjetër shëndetësor, në këtë kuadër QSUT ka për synim të përcaktojë objektiva konkretë rreth të cilave do të përqendrojë përpjekjet për parandalimin dhe uljen e këtyre infeksioneve, të caktojë ekipet e profesionistëve përgjegjës për të siguruar zbatimin me rigorozitet dhe monitorimin e ecurisë së procesit si dhe ndërgjegjësimin e strukturave në të gjitha nivelet duke dërguar një mesazh të qartë mbi parimet e higjienës dhe konceptet e mbrojtjes prej infeksioneve.

Komiteti do përmbushë këto funksione:

• Të hartojë politikat spitalore për parandalimin dhe uljen e infeksioneve në shërbime;
• Të përgatisë një strategji të luftës kundër infeksioneve spitalore, përfshirë edhe survejancën epidemiologjike;
• Të hartojë standarde për procedurat e punës në sallat operatore dhe ambientet e tjera, bazuar në normat për garantimin e higjienës dhe sterilitetit në shërbime;
• Të verifikojë zbatimin efektiv të masave të propozuara për parandalimin dhe uljen e infeksioneve spitalore dhe të raportojë periodikisht pranë drejtorisë;
• Të bëjnë propozime për masa të menjëhershme operative, sa herë identifikohen problematika apo situata me risk të shtuar për infeksione;
• Të hartojë një politikë spitalore për përdorimin e antibiotikëve;
• Të ofrojë trajnime të vazhdueshme të personelit spitalor mbi këto çështje;
• Të hartojnë materiale informuese dhe ndërgjegjësuese.

Programet e kontrollit dhe parandalimit të infeksioneve spitalore përmbushin jo vetëm qëllimin që lidhet më një përkujdes të orientuar dhe fokusuar tek pacienti, por kontribuojnë gjithashtu në mbrojtjen e stafit mjekësor dhe përkujdesës shëndetësor, vizitorëve, studentëve dhe të gjithë atyre në kontakt me këto mjedise si dhe nëpërmjet një programi efikas sigurojnë një trajtë të drejtë kosto-përfitimi.

QSUT në shifra 2013

Sfidat: Transparencë, komunikim, llogaridhënie.

Qendra Spitalore Universitare “Nënë Tereza” zhvilloi sot në ambientet e hotel “Tirana International” analizën e punës vjetore ku merrnin pjesë Ministri i Shëndetësisë Ilir Beqaj, Drejtoresha e QSUT-së Ogerta Manastirliu, Drejtori i ISKSH Astrit Beci, Rektorja e Universitetit të Mjekësisë Jera Kruja, Dekani i Fakultetit të Mjekësisë Bajram Hysa, shefat e shërbimeve dhe pavijoneve, kryeinfermierë, infermierë dhe punonjës të administratës. Analiza vjetore u zhvillua në formë bashkëbisedimi mes drejtuesve të shëndetësisë dhe personelit mjekësor, ku të gjitha palët parashtruan kërkesat, vërejtjet, sugjerimet, alternativat për zgjidhjen e problemeve vitin në vazhdim si dhe falenderimet për punën e kryer gjatë vitit që lamë pas.

“Nuk është asnjëherë e tepërt të theksojmë atë që është misioni parësor i Qendrës Spitalore Universitare “Nënë Tereza”: Një shërbim mjekësor profesional dhe cilësor që në fokus ka vetëm përmbushjen e nevojave të pacientit”, – tha në fjalën e saj Drejtoresha Manastirliu.

Sipas saj, gjatë kësaj periudhe është punuar që të identifikohen e më tej të vihen në rrugën e zgjidhjes, ato probleme që prej kohësh kanë qenë të pranishme në punën e përditshme të QSUT.

Manastirliu u shpreh se “Ajo që kemi konstatuar gjatë kësaj kohe, është se të gjitha kërkesat dhe ankesat, të gjitha sugjerimet dhe propozimet e ardhura si nga pacientët, mjekët, infermierët apo nga qytetarë dashamirës vijnë e bashkohen në tre elementë thelbësorë:

• Nevojë për më shumë transparencë!
• Nevojë për më shumë komunikim!
• Nevojë për më shumë llogaridhënie ndaj pacientëve dhe familjarëve!

Prandaj përpara se të bëj prezantimin e punës, pikërisht këto do të doja të theksoja edhe një herë sot, në emër të administratës së QSUT si dhe atyre qindra sanitarëve, infermiereve, mjekëve e profesorëve të nderuar: Transparencë, Komunikim, Llogaridhënie”.

Më tej Drejtoresha e QSUT parashtroi objektivat e punës për këtë vit e në vazhdim, “Me buxhetin e këtij viti (2014) kemi në dispozicion më shumë fonde për barnat e materialet mjekësore, kemi dyfishim të fondeve për citostatikët dhe për analizat laboratorike, kemi përmirësim të infrastrukturës spitalore për sallën e operacioneve për kardiokirurgjinë dhe fillimin e përgatitjes së projekteve për ndërtimin e 7 sallave të operacionit në Spitalin e ri si dhe rehabilitimin e plotë të spitalit të Sëmundjeve të Brendshme nëpërmjet kredisë që pritet nga Banka e Këshillit të Europës”, u shpreh ajo.

Manastirliu u ndal tek një prej hapave të ndërmarrë që në fillim të marrjes së detyrës në krye të QSUT, atë të nisjes së procesit të hapur e transparent të bashkëpunimit ndërmjet shërbimeve mjekësore, për planifikimin spitalor për barnat dhe materialet mjekësore. “Qëllimi ishte ndërtimi i një mënyre të re komunikimi që në themel kishte pjesëmarrjen dhe vendim-marrjen në grup. Dhe arritëm të bëjmë një parashikim të nevojave spitalore falë kontributit të çdo shërbimi. Ishte një proces gjatë të cilit arritëm të identifikojmë pikat e dobëta siç ishin sasitë e stoqeve të mbetura apo barnave të skaduara e të mbetura për vite me radhë në depot e spitalit, por edhe rrugët për të mundësuar shmangien e këtyre problemeve në të ardhmen”, u shpreh Manastirliu duke falënderuar stafin e Ministrisë së Shëndetësisë për bashkëpunimin dhe mbështetjen dhe në mënyrë të veçantë, Ministrin Beqaj.

Ministri i Shëndetësisë, Ilir Beqaj, gjatë fjalës së tij, theksoi se “QSUT është ndërmarrja më e madhe ekonomike publike në Shqipëri, ka rreth 2700 të punësuar, ka një buxhet prej rreth 45 milion $ dhe është ndoshta organizmi më i madh social në vend  për nga numri i njerëzve që hyjnë në të brenda vitit, si të sëmurë, familjarë apo dhe si profesionistë. Me atë çfarë arritëm të realizojmë, me miratimin e buxhetit 2014 jemi të fokusuar të kemi furnizim shumë të mirë  me barna dhe materiale mjekësore, të kemi një funksionim të mirë të dy shërbimeve që mund t’i quajmë horizontale që u shërbejnë specialistëve të laboratorëve dhe pajisjeve biomjekësore, të mund të mbyllim disa investime të nisura vitin e kaluar apo investime të vogla dhe të punojmë fort që deri në shtator të kemi të garantuara për vitin e ardhshëm të paktën 40 milionë euro në QSUT”.

Sipas Ministrit Beqaj, do të përfundojnë brenda këtij viti pagesat për spitalin e Neurologjisë dhe po garantohen pajisjet me mjetet e duhura për këtë spital dhe në buxhet janë fondet për të ndërtuar bunkerin e Akseleratorit Linear të Onkologjisë dhe më pas me kredinë austriake që miratohet nesër në seancën plenare do të mundësohet në fillim të vitit 2015 përmirësimi i kushteve të sallës së operacioneve në Kardiokirurgji  dhe vënia në funksionim e saj. Ministri Beqaj në fund të fjalës së tij kërkoi nga shefat e shërbimeve dhe mjekët e QSUT-së që të reduktojnë kërkesat për shtyrjen e moshës së pensionit .

Në Qendrën Spitalore Universitare “Nënë Tereza” ka nisur cikli i trajnimeve për Edukimin në Vazhdim për personelin infermieror. Edukimi në vazhdim është një ndër objektivat strategjikë të QSUT si një institucion ofrues i shërbimeve dhe mësimdhënies. Ky objektiv lidhet me përmirësimin në vazhdim të cilësisë së stafit aktual të shërbimeve mjekësore.

Për të siguruar stafe të kualifikuara QSUT po mbështetet dhe në politikat e reja për rekrutimin e stafeve nëpërmjet konkurseve të pranimit dhe përcaktimit të kritereve specifike dhe aftësive profesionale për çdo kategori shërbimi.

Cikli i trajnimeve për stafin infermieror ka filluar në datën 12 Shkurt. Nga ky trajnim do të përfitojnë rreth 600 infermierë dhe kryeinfermierë të cilët janë identifikuar për të përftuar këto njohuri.

Moduli i parë trajnues ka nisur me temën “Komunikimi dhe etika me pacientin”. Ky trajnim ka për synim të përmirësojë aftësitë njohëse dhe zhvillojë sjelljen profesionale në marrëdhënie me pacientin dhe familjarët nëpërmjet teknikave bashkëkohore.

Në ditët aktuale roli i profesionistëve të kujdesit infermieror ka njohur një dimension të ri duke u vlerësuar si një ndër komponentët më kritikë të sistemit të kujdesit shëndetësor. Ky profesion është sot i orientuar drejt vlerave të veçanta njerëzore, njohurive shkencore dhe aftësive teknike. Kur respektimi i këtyre parimeve shoqërohet me sjelljen e përshtatshme dhe vullnetin e duhur atëherë infermieristika është më shumë një thirrje e lartë shpirtërore se sa thjesht një profesion. Në përpjekjen për të përkthyer vlerat më të larta në sjellje konkrete profesionale një infermier i mirë është:

• I dhembshur dhe vetëmohues;
• I pajisur me inteligjencë të lartë emocionale;
• I etur për dije dhe i ndërgjegjshëm për sfidat dhe zhvillimet që shoqërojnë profesionin.

Ndër vite hulumtimet kanë provuar se mënyra e sjelljes dhe qasja e profesionistëve të kujdesit infermieror ka një efekt të rëndësishëm në shëndetin e pacientëve, një fjalë e ngrohtë, një mendim i këndshëm mund të kultivojnë shëndet më të mirë apo dhe të çojnë përpara procesin e shërimit të tyre. Me pacientit në qendër, përkujdesjen ndaj tij apo punën e përditshme me pajisje të teknologjisë së lartë, sot infermierët adresohen si avokatët e mirëqënies së pacientit.

Programi i Edukimit në Vazhdim për personelin infermieror i përgjigjet këtyre pritshmërive si dhe nevojave imediate të mbështetura në vëzhgimet e fundit të realizuara nga Sektori i Marrëdhënieve me Publikun dhe Sektori i Edukimit në vazhdim dhe kontribuon direkt në zhvillimin e stafit dhe motivimin e tij.